ایردستیں راجانی تہا نودربر ءُ لس مہلوک پرچا چہ کتاب ءُ زانت ءَ دور کنگ جہد بیت؟
ایر دستیں راجانی تہا زورآور مدام راج ءِ زانتکار آئی ئے پگری کار ءُ راجے زانشتی ءُ ربیدگی پروگراماں مدام ولگوْج کنگ ءِ
جہد ءَ کنت. پرچا کہ زانت ءُ سرپدی پروگرام مہلوکے تہا زانت ودی کن انت، آہانی لیکہ ءَ مہکم کن انت ءُ زوراکی ئے دیما اوشتگ ءِ سکین ءَ دئینت.
ایردستیں راجے ءَ را کتاباں چہ دور کنگ علم ءُ زانت ءَ چہ دور کنگ ءِ مول ءُ مراد ریاست وتی هاکمی ءُ زوراکی ءَ برجاه بداریت، ءُ اے وڈیں هچ کار ءَ اوپار نہ کنت کہ دیما ریاست ءِ واستہ راہ ءِ ڈنگر جوڈ بہ بیت.
نوآبادیاتی بندپتر ءَ اگاں بچاریں مارا بازیں ایردستیں راج ءَ نی تہا اے درور گندگ ءَ کئیت کہ زورگیرانی چم مدام گوں ایردستیں راجے زبان، آئی ءِ دود ءُ ربیدگ ءُ زانتے هما پِڑ ءَ نی سرا بوتگ انت کہ ایردستیں راج همودا چہ زانت زوریت.
نوآبادیاتی تاگتانی بنداتی کار هم همدا چہ بندات بنت، زورگیر مدام ایردستیں راجے زبان آئی ءِ دود ءُ ربیدگ زانشتی پِڑ آں ولگوج کنت ءُ وتی بیانیہ ءَ دیم ءَ کاریت. ایردستیں راجے زبان ءَ گار کنگ ءُ وتی زبان ءَ دیم ءَ آرگ ءِ جہد ءَ کنت ءُ زبان ءَ گوں دود بندوک انت، همے رنگ ءَ ایردستیں راج ءَ انچیں جاہے ءَ کاریت سر کنت کہ ایردستیں راج وت کنفیوژن ءِ آماچ بیت نزانت کہ کجام چیز منی انت. ایشی ءَ ابید زورگیر زانشتی پڑانی سرا بندش جنت ءُ وانگجاه آں وتی بیانیہ مہکم کنگے هاترا وتی چیزاں نودربرانانی مجگ آں مان کنت کہ شعور ءُ راستی ءَ چہ آہانی چم کور بہ بنت.
مارا اے وڈیں سک باز درور دست کپیت کہ نوآبادیاتی تاگتانی زوراکی ءَ ابید هم ایر دستیں راج وتی زانت ءِ شوہاز ءَ در کپ انت ءُ وتی راج ءَ وت وانین انت ءُ سرپد کن انت. ما اے درور هم دیستگ کہ زوراکانی زوراکی ءَ ابید هم نوآبادیاتی تاگتانی هلاپ ءَ آشوبی جنز پاد اتکگ انت ءُ زوراک ءِ سرین پروشتگ.
مرچی ما گندیں کہ بلوچستان ءَ زوراکیں استان کتاب ءُ زانشتی پروگرامانی سرا چنچو بندش جنگ ءَ انت داں کہ راجے تہا شعور ودی مہ بیت مہلوک بہ ترسیت ءُ دیمترا اے وڈیں کارے ئے کنگ ءَ پیسر هزار رند بہ جیڈ ایت. مرچی کہ گوادرے تہا نودربر ءُ کتاب بندیگ انت اگاں ریاستے اے عمل ءِ هلاپ ءَ راج پاد مئیت ءُ گہگیری مہ کنت باندا گڈا گہگیری کنگے هم موه نہ رسیت.